Lo president de l‘Academia Aragonesa de la Lengua, Javier Giralt, y lo Lugartenient d’o Chusticia (en funcions de Chusticia), Javier Hernández, han sinyau lo viernes 15 de setiembre en o palacio d’Armijo un convenio marco de colaboración entre las dos institucions.
L’obchectivo d’o convenio ye la colaboración entre l’Academia y lo Chusticiau pa fomentar l’uso, protección y promoción d’as luengas y modalidaz lingüisticas propias d’Aragón a traviés de cualsequier actividat programada entre las partes. En concreto, se podrán fer publicacions, charradas, conferencias, cursos, convocar premios u cualsequier atra actividat en o marco de l’obchectivo cheneral d’o convenio, asinas como revisar y traducir los textos que las partes consideren d’interés. Amás, l’Academia asesorará a Lo Chusticia sobre temas relacionaus con l’uso correcto d’as luengas y modalidaz lingüisticas propias y con a suya promoción social.
